Autoriteti i Konkurrencës do të hapë hetim për tregun e sigurimeve
Autoriteti i Konkurrencës pritet të nisë hetim për tregun e sigurimeve, me fokus kryesor te funksionimi i konkurrencës në sigurimin e detyrueshëm motorik.
Kreu i Komisionit të Konkurrencës, Denar Biba, konfirmoi se ky treg do të jetë së shpejti objekt hetimi, pas diskutimeve të vazhdueshme në Komisionin Kuvendor për Ekonominë, Financat dhe Punësimin.
Fokus te sigurimi i detyrueshëm TPL
Çështja kryesore lidhet me mënyrën si funksionon konkurrenca në tregun e sigurimit të detyrueshëm për përgjegjësitë ndaj palëve të treta (TPL), një segment që ka qenë shpesh në vëmendje të institucioneve.
Një projektrezolutë e mëparshme e Komisionit të Ekonomisë kishte kërkuar hetim të këtij tregu, veçanërisht për të verifikuar nëse ka praktika që kufizojnë konkurrencën apo ndikojnë në fiksimin e çmimeve. Hetimi do të përfshinte edhe analizën e shkëmbimit të informacionit mes kompanive të sigurimit dhe ndikimin e tij në sjelljen tregtare të tyre.
Dyshime për koordinim çmimesh
Propozimet e mëparshme kanë ngritur shqetësime edhe për ekzistencën e platformave apo mekanizmave që mundësojnë koordinimin e çmimeve dhe ndarjen e tregut mes operatorëve. Po ashtu, është kërkuar bashkëpunim mes Autoritetit të Mbikëqyrjes Financiare dhe institucioneve të tjera për të rritur transparencën dhe mbrojtjen e konsumatorëve.
Qëndrimi i AMF për konkurrencën
Ndërkohë, Autoriteti i Mbikëqyrjes Financiare ka vlerësuar se tregu i sigurimeve të detyrueshme motorike paraqet një nivel të pranueshëm konkurrencë, duke theksuar se presioni konkurrues mes kompanive ekziston, pavarësisht natyrës së rregulluar të produktit. Sipas AMF, vlerësimi përfundimtar për sjellje të mundshme anti-konkurruese i takon Autoritetit të Konkurrencës.
Një treg i hetuar edhe më parë
Tregu i sigurimit TPL ka qenë edhe më herët objekt hetimi nga Autoriteti i Konkurrencës, ndërsa problematikat e konstatuara janë adresuar kryesisht përmes rekomandimeve për institucionet mbikëqyrëse.
k.jpg)